ಮಂಜೇಸರೊ: ತುಳುನಾಡ್ದ ಜನಮಂದೆ ಒಲ್ಪ ಇತ್ತುಂಡಲಾ ಜನಕ್ಲೆನ ಬೇನೆ ಬೇಜಾರ್ ಗ್ ಸಕಾಯೋ ಕೊರ್ಪೆರ್ ಪನ್ಪಿನೈಕ್ ಉಂದೊಂಜಿ ಸಾಕ್ಷಿ.
ಏಳ್ ಕಡಲ ಅಪೆದ ಮರ್ಗಿಲ್ಡ್ ಇತ್ತಿನ "ಕುವೈಟ್ ತುಳುಕೂಟ" ಪನ್ಪಿನ ಕೂಟೊ ಕೇರಳ-ಕರ್ನಾಟಕೊದ ಗಡಿಭಾಗವಾಯಿನ ತಲಪಾಡಿ-ಮಂಜೇಸರೊದ ಜಾಗೆಲೆಡ್ ಲಾಕ್ ಡೌನ್ ಆಯಿನೆಡ್ದಾವರ ಬೇಲೆಡಿತ್ತಿನ ಪೋಲಿಸ್ ದಕ್ಲೆಗ್, ಆರೋಗ್ಯಾಧಿಕಾರಿನಕ್ಲೆಗ್ ಬೊಕ್ಕ ಬೇತೆ ಬೇತೆ ರಾಜ್ಯೊಗುಲೆಡ್ದ್ ಕೇರಳ - ಕರ್ನಾಟಕ ಪೊಪಿನ ಲಾರಿ ಡ್ರೈವರ್ ಕ್ಲಿನರ್ ಗುಲೆಗ್, ಸೌಖ್ಯದಾಂತಿನ ಪ್ರಾಯದಕ್ಲೆಗ್,ಬಿಕ್ಷೆ ನಟ್ಟ್ ದ್ ಬದ್ಕುನಕ್ಲೆಗ್ ಮಧ್ಯಾನದ ಬೆಚ್ಚ ವನಸ್ ಕೊರ್ಯೆರ್.
ಕೋವಿಡ್ ಲಾಕ್ ಡೌನ್ ಆಯಿನೆಡ್ದಾವರ ಸ್ಕಂದ ಹೆಲ್ಪ್ ಡೆಸ್ಕ್ ಮಂಜೇಶ್ವರ ಲಾಕ್ ಡೌನ್ ದ ದಿನಕ್ಲೊಡ್ ಕೊರ್ಪುನ 34ನೇ ದಿನತ್ತ ಮಧ್ಯಾಹ್ನ ವನಸ್ಸ್ ದ ಪ್ರಾಯೋಜಕತ್ವ ವಹಿಸಿದ್ ಸಕಾಯೋ ಕೊರ್ತು ತುಳುನಾಡ್ದ ಜನಕ್ಲೆನ ಬಗ್ಗೆ ಪ್ರೀತಿ ಪಟ್ಟೊಂಡೆರ್.
ಕರಿನ 21 ವರ್ಸೊಡ್ದಿಂಚಿ ತುಳುನಾಡ ಪರಪೋಕು (ಸಂಸ್ಕೃತಿ) ಬೊಕ್ಕಸಾಮಾಜಿಕ,ಸಾಂಸ್ಕೃತಿಕ,ಸಾಹಿತ್ಯೊದ ಬುಳೆಚ್ಚಿಲ್ ಗ್ ಕಾನಿಕೆ ಕೊರ್ತಿನ ಬಿರ್ದ್ ದ ತುಳುಕೂಟ ಕುವೈಟ್.ಕರ್ನಾಟಕ ರಾಜ್ಯ ತುಳು ಸಾಹಿತ್ಯ ಅಕಾಡೆಮಿಡ್ದ್ ವಿಶೇಷ ಸಂಘಟನಾ ಬಲ್ಮೊನೊನು ಪಡೆಯೊಂದಿನ ಸಂಘಟನೆ. ಕುವೈಟ್ ತುಳುಕೂಟದ ಮುತಾಲಿಕೆಡ್ ತುಳುಪರ್ಬ, ಕ್ಷೇಮಾಭಿವೃದ್ಧಿ,ಶೈಕ್ಷಣಿಕ, ಸಂಗೀತ ,ಸಾಂಸ್ಕೃತಿಕ ಕಾರ್ಯೊಲೆನ್ ಪೊರ್ಲು ಪೊಲಿಗೆಡ್ ನಡಪಾವೊಂದು ಬರೊಂದುಂಡು.
ವಿಶೇಷ ಚಾನೆಲ್ ವರದಿಗ್ ಸ್ಪಂದನೆ: ಮಂಜೇಸರೋ ಬಾಗೊಡು ಸ್ಕಂದ ಹೆಲ್ಪ್ ಡೆಸ್ಕ್ ಮಂಜೇಶ್ವರ ಲಾಕ್ ಡೌನ್ ಪೊರ್ತುಡು ವನಸ್ಸ್ ಪಟ್ಟುನ ವರದಿನ್ ವಿಶೇಷ ಚಾನೆಲ್ ಲಿಂಕ್ ಡ್ ತೂಯಿನ ಕುವೈಟ್ ತುಳುಕೂಟೊದ ಪದಾಧಿಕಾರಿಲು ಸ್ವಪ್ರೇರಣೆ ಮುಕಾಂತ್ರ ವನಸ್ ಕೊರ್ಯೆರ ದುಂಬು ಬತ್ತಿನವು ಪೆರ್ಮೆದ ವಿಚಾರವಾದುಂಡು.
ಈ ನಿಲೆಟ್ಟ್ ಸುಕ್ರಾರೊ,ಸನಿವಾರ ಇಂಚ ರಡ್ಡ್ ದಿನತ್ತ ವನಸ್ ತನ್ಕುಲೆ ಲೆಕ್ಕೊಡು ಪಟ್ಯೆರೆ ಬೋಡಾದ್ ವಿಶೇಷ ಚಾನೆಲ್ ದ ಕಾರ್ಯ ನಿರ್ವಾಹಕೆರಾಯಿನ ವಿಜಯ ಕುಮಾರ್ ಶೆಟ್ಟಿ ಯುಎಇ ಮೇರೆನ್ ಸಂಪರ್ಕ ಮಲ್ತ್ ದ್ ಸ್ಕಂದ ಹೆಲ್ಪ್ ಡೆಸ್ಕ್ ಗ್ಕು ಕುವೈಟ್ ತುಳುಕೂಟೊದ ಪದಾಧಿಕಾರಿಲು ಸಕಾಯೊ ಕೊರ್ಯೆರ್.
0 Comments