ಟೀಮ್ ಬೊಕ್ಕ ಥೀಮ್ ವರ್ಕ್ಡ್ ಕಲಾಭಿಮಾನಿಗುಲೆನ ಮನಸ್ಸು ಗೆಂದಿನ ಬಾಡೂರುದ ನವಚೇತನ ಕಲಾವಿದೆರೆನ "ಕಾಸ್‌ದ ಕಸರತ್ತ್ " ನಾಟಕ ಪ್ರದರ್ಶನ

ವೃತ್ತಿಪರ ನಾಟಕ ತಂಡೊಗುಲು ಬೊಕ್ಕ ಕಲಾವಿದೆರ್ ತನ್ಕುಲೆ ನಾಟಕ ಪ್ರದರ್ಶನೊಗು ಅತ್ ಕಾಸ್ ಅಪುಂಡು ಈತ್ ಕಾಸ್ ಅಪುಂಡು ಪಂದ್ ಕಾಸ್‌ದನೇ ಕಸರತ್ ಗೊಬ್ಬುನೈತ ನಡುಟ್ಟು ಮೂಲೊಂಜಿ ಗ್ರಾಮೀಣ ಪ್ರದೇಶದ ಕಲಾವಿದೆರ್ ಕಾಸ್‌ದ ಕಸರತ್ ಪನ್ಪಿ ನಾಟಕೊದ ಮುಖಾಂತರೊ ಕಲಾಭಿಮಾನಿಗುಲೆನ ಮನಸ್ಸು ಗೆಂದುನ ಪ್ರಯತ್ನ ಮಲ್ತಿನೈಕ್ ತೂಯಿನ ಜನ ಶಹಬ್ಬಾಸ್ ಪನೊಂದುಲ್ಲೆರ್. ಅಂದ್ ಸಾವಿರ ಸಾವಿರ ಕಾಸ್ ಖರ್ಚ್ ಮಲ್ತ್ ದ್ ಒಲ್ಪೊ ಒಲ್ಪದನೋ ತಂಡಗುಲೆನ್ ಕನತ್‌ದ್ ಕಾಸ್ ಕಳೆಪುನೈಕ್ ಬೋಡಾದ್ ಬಾಡೂರುದ ನವಚೇತನ ಕಲಾ ತಂಡೊದಕುಲು ಕರಿನ ಶಿವರಾತ್ರೆಗ್ ಕೈತಲ್‌ದ ದೇಲಂಪಾಡಿ ಮಹಾಲಿಂಗೇಶ್ವರನ ಮಣ್ಣಡ್ ಕಾಸ್ ದ ಕಸರತ್ತ್ ಪನ್ಪಿ ನಾಟಕ ಪ್ರಾಕ್ಟಿಸ್ ಮಲ್ತ್ದ್ ಗೊಬ್ಬಿಯೆರ್. ಮೊಕ್ಲೆನ ಕಲಾ ಸೇವೆನ್ ತೂಯಿನ ಜನ ಮಂದೆ ಶಹಬ್ಬಾಸ್ ಪಂದ್ ಕೈತಾಟಿ ಬೊಟ್ಟಿಯೆರ್. 

ಸುರುತ್ತ ಪ್ರದರ್ಶನನೆ ಜನಕ್ಲೆನ ಮನಸ್ಸ್ ಗೆಂದಿನೈಡ್ದವರ ಕುಡ ಒಂಜಿ ನಾಟಕ ವಾರೊದ ಉಲಯಿಡ್ ಬುಕ್ಕಿಂಗ್ ಆಂಡ್ ಅವು ಮುರಾನಿ ಗೋಳಿತ್ತಾರುದ ಶ್ರೀಸಿದ್ಧಿವಿನಾಯಕ ಭಜನಾ ಮಂದಿರದ ಪ್ರತಿಷ್ಠಾ ಮಹೋತ್ಸವದ ಸಂದೆರ್ಪುಡು ಪ್ರದರ್ಶನ ಅಪುನೈತ ಒಟ್ಟುಗೆ ಕೂಡ್ದಿ ಕಲಾಭಿಮಾನಿಲೆನ ಮನಸ್ಸ್ ಗೆಂದ್ಯರೆಲಾ ಕಾರಣ ಅಂಡ್. 

ಸುಬ್ಬು ಸಂಟ್ಯಾರ್ ಬರೆತಿನ ನಾಟಕೊನು ವಿಠಲ ರೈ ಮಂಟಪ್ಪಾಡಿ ಮೆರೆನ ಮುತಾಲಿಕೆಡ್ ರಂಗೊಗು ಕನತಿನೈಟ್ ಊರುದ ಪಂಡಾ ಬಾಡೂರು ದೇಲಂಪಾಡಿ ಅಸುಪಾಸುದ ಕಲಾವಿದೆರೆ ಎಚ್ಚ ಇತ್ತಿನೆ ಅತ್ತಂದೆ ವೃತ್ತಿಪರ ತಂಡೊಲುಗು ಪೈಪೊಟಿ ಕರ‍್ಪುನಂಚಿನ ಅಭಿನಯೊಡು ನಮ್ಮೂರದ್ದ ಕಲಾವಿದೆರ್‌ಲಾ ದಾಲ ಕಮ್ಮಿ ಇಜ್ಜೆರ್ ಪನ್ಪಿನೈನ್ ಈ ನಾಟಕ ಸುರುಡ್ದು ಕಡೆ ಮುಟ್ಟಲಾ ನಿರೂಪಿಸಾವುಂಡು. ಗಂಭೀರ ಕಥಾ ಚಿತ್ರಣೊಡು ಆರಂಭ ಆಪುನ ನಾಟಕ ನಡುಟ್ಟು ನಡುಟ್ಟು ಕುತೂಹಲವಾಯಿನ ಕಥಾ ಹಂದರೊನು ಕನಪುನೈತ ಒಟ್ಟುಗೆ ಕುಸಾಲ್,ಪದೊ, ಭಾಷೆದ,ಮತೀಯ ಸಾಮರಾಸ್ಯೊಲೆನ್ ಬಿಂಬಿಸಾವುಂಡು. 

ಕಲಾವಿದೆರಾಯಿನ ವಿಠಲ ರೈ ಮಂಟಪ್ಪಾಡಿ (ಸಂತು),ಕಿಶನ್ ಮಂಗಳದೇವಿ(ಮಾಯಾವತಿ) ಸೂರ್ಯ ರೈ (ಯಜಮಾನ್ ನಂದಕುಮಾರ),ಸತೀಶ ರೈ (ವಿಲನ್ ಗೋವಿಂದೆ) ತ್ಯಾಂಪಣ್ಣ ರೈ (ಅಪ್ಪು ಚೇಟ),ಸಚಿನ್ ರಾಜ್(ಎಲೈಸಿ ಬ್ರೋಕರ್ ರಮಾನಂದ),ಪವನ್ (ಅಂಗಡಿ ಮುರುಘ), ರಸಾಕ್ ಅಂಗಡಿಮೊಗೇರ್ (ಹಿಂದಿ ಜಗ್ಗ), ಆನಂದ ದೇಲಂಪಾಡಿ (ಬೇಕರಿ ಬಾಬಣ್ಣ), ಕೃಪರಾಜ್ ಬಾಡೂರು (ಬಸವ ಗೌಡ), ಪ್ರವೀಣ್ ದೇಲಂಪಾಡಿ (ಕಥಾ ನಾಯಕ ವಿನಯ್), ವರ್ಷಾ(ರೋಜಾ),ಚಂದನಾ ಕುಡ್ಲ (ಕಥಾ ನಾಯಕಿ ಮಂಗಳ) ಅತ್ತಂದೆ ಸತೀಶ್ ಮಾಸ್ತರ್ ಜಾಲು ,ನಿತೀನ್ ವಿಶೇಷ ಪಾತ್ರೊಲೆಡ್ ತೋಜಿದ್ ಬತ್ತೆರ್. 

ಥ್ರೂ ಔಟ್ ಕಾಮೆಡಿದ ನಡುಟ್ಟು ಗ್ರಾಮೀಣ ಪ್ರದೇಶೊಗು ಸೂಟ್ ಆಯಿನ ಕತೆನ್ ಮುಡೆದ್ ಅವೆನ್ ಕಲಾಭಿಮಾನಿಗುಲೆನ ದುಂಬು ದೀಪಿನೈಟ್ ನವಚೇತನದ ಥೀಮ್ & ಟೀಮ್ ವರ್ಕ್ ಗೆಂದುಂಡು. 

ಕಡಿಮೆ ಖರ್ಚಿಡ್ ಪಂಡಾ ಸಮಾಜೊಗು ಒಪ್ಪುನ ರೀತಿಡ್ ಇತಿ ಮಿತಿದ ಹಾಸ್ಯ, ಕಥೆ, ಒಟ್ಟುಗು ಕಡೆ ಮುಟ್ಟಲಾ ಜನಕ್ಲೆನ್ ನಿರೀಕ್ಷೆಡ್ ದೀಪಿನಂಚಿನ ಅಭಿನಯ ಉಂದು ಈ ತಂಡದ ಹೈಲೈಟ್ಸ್, ಅಂಚನೆ ಜ್ಞಾನೇಶ್ ಮಂಜೇಶ್ವರ ಸಂಗೀತ, ಲಿತು ಆರ್ಟ್ಸ್ ಶಾಂತಿನಗರ ಧ್ವನಿ,ಬೊಲ್ಪು ನಾಟಕದ ರಂಗಾಲಂಕಾರೊಡುಲಾ ಈ ನಾಟಕ ಕಡಿಮೆ ಖರ್ಚಿಡ್ ರಂಗದ ಮಿತ್ತ್ ಮಿನ್ಕುಂಡು.. 

ಇನಿತ್ತ ಮಲ್ಲ ಮಲ್ಲ ಕಲಾವಿದೆರೆನಕ್ಲೆನ್ ಮಾಂತ ಬುಲೆಪಾಯಿನಿ ನಮ್ಮಂಚಿ ಕಲಾಭಿಮಾನಿಲು ಅಂಚನೆ ಕಲಾ ಪ್ರೋತ್ಸಾಹಕರ್ ಅಯಿನೈಡ್ದಾವರ ಇಂಚಿನ ಒಂಜಿ ಎಲ್ಯ ತಂಡೊದ ಮಾಮಲ್ಲ ಕಲಾ ಸಾಧನೆಗ್ ನನಲಾತ್ ಅವಕಾಶ ಮಲ್ತ್ ಕೊರ್ಪುನೈತ ಮೂಲಕ ನಮ್ಮೂರ‍್ದ ಕಲಾವಿದೆರ್‌ಲಾ ದುಂಬೊಂಜಿ ದಿನ ರಂಗೊದ ಮಾನಾದಿಗೆಗ್ ಪಾತ್ರರಾವಡ್ ಪನೊಂದು ಮಾಂತೆರ್ಲ ಈ ತಂಡಗೊಂಜಿ ಅವಕಾಶ ಮಲ್ತ್ ಕೊರುಂಡ ಇಂಚಿನ ಕಲಾವಿದೆರೆ ಅಭಿನಯ ಬೊಲ್ಪುಗು ಬರು ಪನ್ಪಿನವು ಎನ್ನ ಅನಿಸಿಕೆ.

✍️ ಜಯ ಮಣಿಯಂಪಾರೆ - ಪತ್ರಕರ್ತೆರ್ ,ಕಾಸ್ರೋಡು